Спортын менежментийн ирээдүйн мэргэжилтэн бэлтгэх хөтөлбөр хэрэгжинэ

Монгол Улсад спортын менежментийн чиглэлээр мэргэжлийн боловсон хүчин бэлтгэх шинэ шатны хөтөлбөр анх удаа хэрэгжих гэж байна. Энэхүү гурван талт хамтын ажиллагааны хүрээнд спортын салбарын байгууллагууд, Монгол Улсын Боловсролын Их Сургуулийн Биеийн Тамирын Сургууль, мөн Монголын Спортын Корпораци-ийн дэргэдэх СПОК академи хамтран ажиллах юм.

Хөтөлбөрийн гол зорилго нь Монголын спортын холбоо, клуб, спортын бизнесийн байгууллагуудын өсөн нэмэгдэж буй хүний нөөцийн хэрэгцээг хангах, олон улсын түвшинд өрсөлдөх чадвартай, орчин үеийн мэдлэг, ур чадвар бүхий спортын менежерүүдийг бэлтгэхэд оршино.

Энэхүү хөтөлбөр нь спортын менежментийн чиглэлээр бакалаврын зэрэг олгох бөгөөд онол, практик хосолсон сургалтын онцлогтой. Тодруулбал, академик мэдлэгийг спортын салбарын бодит орчин, дадлага туршлагатай уялдуулан олгохоор төлөвлөсөн. Ингэснээр суралцагчид зөвхөн онолын мэдлэг эзэмшихээс гадна бодит ажлын орчинд дадлагажих боломжтой болох юм.

Хөтөлбөрийг Монгол Улсын Боловсролын Их Сургуулийн Биеийн Тамирын Сургуулийн 2026–2027 оны хичээлийн жилийн намрын элсэлтээс эхлэн албан ёсоор хэрэгжүүлж эхэлнэ.

Энэхүү хамтын ажиллагаа нь Монгол Улсад спортын менежментийн боловсролыг системтэйгээр хөгжүүлэх, боловсрол болон спортын салбарын уялдаа холбоог шинэ түвшинд хүргэх стратегийн ач холбогдолтой алхам болж байгаагаараа онцлог юм.

Цаашид уг хөтөлбөрийн хүрээнд төр, хувийн хэвшил, спортын байгууллагуудын хамтын ажиллагаа улам өргөжин тэлж, Монголын спортын салбарын хөгжилд чухал хувь нэмэр оруулах хүлээлттэй байна.