“БИЕИЙН ТАМИРЫН БАГА БОЛОВСРОЛЫН ХӨТӨЛБӨРИЙН ШИНЭЧЛЭЛ” СЭДЭВТ ТАНИЛЦУУЛГА, СЕМИНАР ЗОХИОН БАЙГУУЛЛАА

“БИЕИЙН ТАМИРЫН БАГА БОЛОВСРОЛЫН ХӨТӨЛБӨРИЙН ШИНЭЧЛЭЛ” СЭДЭВТ ТАНИЛЦУУЛГА, СЕМИНАР ЗОХИОН БАЙГУУЛЛАА

МУБИС-ийн Биеийн тамирын сургуулийн Бие бялдрын боловсрол, хөдөлгөөн заслын тэнхимээс 2026 оны 11 дүгээр сарын 18-ны өдөр “Биеийн тамирын бага боловсролын хөтөлбөрийн шинэчлэл” сэдэвт танилцуулга, семинарыг зохион байгууллаа.

Тус семинарыг Спортын мэргэжлийн онол, арга зүйн тэнхимийн зөвлөх профессор, бага боловсролын биеийн тамирын сургалтын хөтөлбөр боловсруулах багийн нарийн бичгийн дарга Л.Уртнасан удирдан явуулж, Биеийн тамирын сургуулийн багш нарт шинэчилсэн сургалтын хөтөлбөрийн үзэл баримтлал, зорилго, агуулга, арга зүйн онцлогийг танилцуулав.

Семинарын үндсэн агуулга

Семинарын хүрээнд бага боловсролын биеийн тамирын сургалтын хөтөлбөрийг шинэчлэх болсон үндэслэл, суралцагчийн эзэмших чадамж, сургалтын агуулга, арга зүй, сургалтын орчин, үнэлгээний асуудлыг авч үзлээ.

Шинэчилсэн хөтөлбөр нь суралцагчийн эзэмших чадамжид суурилж, бие бялдрын хөгжлийг дэмжихийн зэрэгцээ бүтээлч сэтгэлгээ, шүүн тунгаах, харилцах, хамтран ажиллах, суралцахуйд суралцах, нийгэмшихүй-сэтгэл хөдлөлийн хөгжил, үндэсний болон дэлхийн өв соёлыг хүндэтгэх чадамжийг биеийн тамирын хичээлээр дамжуулан хөгжүүлэхэд чиглэж байгааг онцоллоо.

Түүнчлэн сургалтын агуулгыг “Хөдөлгөөн”, “Бие бялдрын хөгжил” гэсэн үндсэн айд тулгуурлан, хөдөлгөөнийг танин мэдэх, бие даан гүйцэтгэх, бүтээлчээр хэрэглэх үе шатаар зохион байгуулах арга зүйн шинэчлэлийг танилцуулав.

Сургалтын арга зүйн хувьд үндсэн хөдөлгөөний чадвар эзэмшүүлэх болон тоглоомд суурилсан сургалтын аргыг онцолж, суралцагчдын идэвхтэй оролцоо, хамтын ажиллагаа, бие даасан байдал, аюулгүй байдлыг хангах, ялгаатай хэрэгцээнд нийцсэн хүртээмжтэй сургалтын орчин бүрдүүлэх асуудлыг хэлэлцлээ.

Семинарын үр дүн, ач холбогдол

Семинарын гол ач холбогдол нь бага боловсролын биеийн тамирын сургалтын хөтөлбөрийн шинэчлэлийг ирээдүйн багш бэлтгэх сургалтын агуулга, арга зүйтэй хэрхэн уялдуулах асуудлыг багш нарын түвшинд авч үзсэнд оршино.

Тодруулбал:

  1. Хөтөлбөрийн шинэчлэлийн талаарх ойлголтыг гүнзгийрүүлэв. Багш нар шинэчилсэн хөтөлбөрийн үзэл баримтлал, чадамжид суурилсан сургалтын зорилго, суралцахуйн үр дүн, агуулга, арга зүйн өөрчлөлттэй танилцах боломж бүрдэв.

  2. Багш бэлтгэх сургалтын агуулга, арга зүйг шинэчлэх чиглэлийг тодотгов. Бага боловсролын багш мэргэжлээр суралцаж буй оюутнуудад шинэ хөтөлбөрийг хэрэгжүүлэх мэдлэг, хөдөлгөөний чадвар, хичээл төлөвлөх болон зохион байгуулах арга зүйн чадамж эзэмшүүлэх хэрэгцээг онцоллоо.

  3. Чадамжид суурилсан хичээл төлөвлөлтийн практик хэрэглээг авч үзэв. Нэгдүгээр ангийн биеийн тамирын хөтөлбөрийн суралцахуйн үр дүнд тулгуурлан алхах, авирах, мөлхөх хөдөлгөөний чадвар болон эрүүл ахуй, аюулгүй байдлын дадлыг хөгжүүлэх үйл ажиллагааг төлөвлөх багийн дадлага ажлын жишээг танилцууллаа.

  4. Суралцагч төвтэй сургалтын арга зүйн ач холбогдлыг тодорхойлов. Тоглоомд суурилсан, идэвхтэй оролцоог дэмжсэн, хүүхдийн хөгжлийн ялгаатай байдлыг харгалзсан сургалтын аргыг багш бэлтгэх үйл ажиллагаанд тусгах шаардлагыг тодотгов.

  5. Багш нарын мэргэжлийн хөгжлийн хамтын ажиллагаанд дэмжлэг үзүүлэв. Сургалтын хөтөлбөрийн шинэчлэлийн талаарх мэдээллийг мэргэжлийн багш нарт хүргэж, багш бэлтгэх сургалтын агуулга, дадлага, арга зүйн уялдаа холбоог сайжруулах асуудлыг хамтран авч үзэх нөхцөл бүрдүүллээ.

Цаашдын ач холбогдол

Энэхүү семинар нь шинэчилсэн бага боловсролын биеийн тамирын сургалтын хөтөлбөрийг хэрэгжүүлэх чадвартай ирээдүйн багшийг бэлтгэхэд МУБИС-ийн Биеийн тамирын сургуулийн сургалтын агуулга, арга зүй, дадлагын үйл ажиллагааг уялдуулан хөгжүүлэх чухал ач холбогдолтой боллоо.

Цаашид семинараар танилцуулсан шинэчлэлийн үзэл баримтлал, чадамжид суурилсан сургалтын арга зүйг багш бэлтгэх хөтөлбөрийн холбогдох хичээлүүдэд тусгах, оюутны багшлах дадлага, ээлжит хичээлийн төлөвлөлттэй уялдуулах, багш нарын арга зүйн хамтын ажиллагааг өргөжүүлэх нь зүйтэй юм.

МУБИС-ийн Биеийн тамирын сургууль

Бусад мэдээ