АЗИЙН НААДАМД ОРОЛЦСОН ОЮУТАН ТАМИРЧДАА ХҮЛЭЭН АВЧ, “ӨГЛӨӨНИЙ УУЛЗАЛТ” ЗОХИОН БАЙГУУЛЛАА
Монгол Улсын Боловсролын Их Сургуулийн Биеийн тамирын сургууль Япон Улсад зохион байгуулагдсан “Айчи–Нагояа 2026” Азийн зуны спортын XX наадамд эх орноо төлөөлөн оролцсон оюутан тамирчдадаа хүндэтгэл үзүүлж, тэдний амжилт, оролцоог онцлон тэмдэглэх зорилгоор “Өглөөний уулзалт” арга хэмжээг зохион байгууллаа.
Тус уулзалтыг МУБИС-ийн Биеийн тамирын сургуулийн Спортын мэргэжлийн онол, арга зүйн тэнхим, Оюутны зөвлөл хамтран зохион байгуулсан бөгөөд Азийн наадамд өрсөлдсөн оюутан тамирчид болон Спортын сэтгүүлчийн ангийн оюутнууд оролцож, спортын амжилт, олон улсын тэмцээний туршлага, тамирчны хариуцлага, спортын сэтгүүл зүйн ач холбогдлын талаар санал бодол, туршлага солилцлоо.
“Айчи–Нагояа 2026” Азийн XX наадам нь 2026 оны есдүгээр сарын 19-нөөс аравдугаар сарын 4-ний өдрүүдэд Япон Улсын Айчи муж, Нагояа хотод “Imagine One Asia” уриан дор зохион байгуулагдсан Азийн спортын томоохон үйл явдал юм.
Энэхүү наадамд Монгол Улсаа төлөөлөн 31 спортын төрөлд 303 тамирчин оролцсон бөгөөд МУБИС-ийн Биеийн тамирын сургуулийн бакалавр, магистрын хөтөлбөрийн 15 оюутан тамирчин, гурван багш-дасгалжуулагч хөнгөн атлетик, жүдо, ширээний теннис, таеквондо, жюү жицү, текбол, ушу зэрэг спортын төрлөөр оролцох багийн бүрэлдэхүүнд багтсан нь тус сургуулийн спортын салбарын хүний нөөц бэлтгэх үйл ажиллагаа, сургалт, спортын бэлтгэлийн уялдааг харуулсан онцлох үйл явдал байв.
МУБИС-ийн JUMP хөтөлбөрийн оюутан Б.Наранхишиг Азийн наадмаас хүрэл медаль хүртэв
Энэ удаагийн Азийн наадмын онцлох амжилтын нэг нь МУБИС-ийн Биеийн тамирын сургуулийн JUMP хөтөлбөрийн оюутан, “Арвижих Ган Инженеринг” ХХК-ийн тамирчин, олон улсын хэмжээний мастер Баасанжаргалын Наранхишигийн хүртсэн хүрэл медаль байлаа.
Жүдогийн тамирчин Б.Гончигсүрэн Азийн наадмын медалийн цуглуулгаа арвижууллаа
Мөн “Айчи–Нагояа 2026” Азийн наадмын жүдо бөхийн эрэгтэйчүүдийн +100 кг-ын жинд “Хилчин” спорт хороо, МУБИС-ийн оюутан, Монгол Улсын үндэсний шигшээ багийн тамирчин Б.Гончигсүрэн хүрэл медаль хүртсэн нь Монголын багийн онцлох амжилтуудын нэг байв.
Спортын амжилт, туршлагыг оюутнуудад түгээсэн уулзалт боллоо
“Өглөөний уулзалт” арга хэмжээ нь олон улсын спортын тэмцээнд оролцсон тамирчдын амжилтыг алдаршуулахаас гадна тэдний хуримтлуулсан туршлагыг ирээдүйн спортын багш, дасгалжуулагч, менежер, сэтгүүлч мэргэжилтнүүдэд түгээн дэлгэрүүлэхэд чиглэснээрээ онцлог байлаа.
Уулзалтын хүрээнд олон улсын спортын тэмцээнд оролцох бэлтгэл, өндөр түвшний өрсөлдөөний онцлог, амжилтад хүрэхэд шаардагдах тэсвэр хатуужил, сэтгэл зүйн бэлтгэл, эх орноо төлөөлөн өрсөлдөхийн бахархал, хариуцлагын талаар харилцан санал бодлоо солилцох боломж бүрдсэн юм.
Мөн Спортын сэтгүүлчийн ангийн оюутнуудын оролцоо нь спортын амжилт, тамирчдын хөдөлмөр зүтгэл, тэмцээний үйл явдал, түүний цаадах үнэ цэнийг олон нийтэд бодитой, мэргэжлийн түвшинд хүргэхийн ач холбогдлыг таниулахад чухал хувь нэмэр орууллаа.
Энэхүү уулзалт нь спортын боловсрол, өндөр амжилтын спорт, спортын сэтгүүл зүй гэсэн чиглэлүүдийн уялдаа холбоог бэхжүүлж, оюутан суралцагчдад мэргэжлийн урам зориг өгсөн, харилцан суралцах боломж бүрдүүлсэн үр өгөөжтэй арга хэмжээ боллоо.
МУБИС-ийн Биеийн тамирын сургууль нь спортын багш, дасгалжуулагч, спортын менежмент, сэтгүүл зүйн салбарын мэргэжилтнүүдийг бэлтгэхийн зэрэгцээ оюутан тамирчдын спортын амжилтыг дэмжих, тэдний туршлагыг сургалт, мэргэжлийн хөгжилтэй уялдуулахад анхааран ажиллаж байна.
Азийн наадамд эх орноо төлөөлөн амжилттай оролцсон нийт оюутан тамирчид, багш-дасгалжуулагчдадаа баяр хүргэж, цаашдын сурлага, хөдөлмөр, спортын үйл хэрэгт нь өндөр амжилт хүсэн ерөөе!
